ଫୋକସ ପ୍ଲସ(ନୂଆଦିଲ୍ଲୀ): ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କୁ ନେଇ ସାରା ଦେଶରେ ବେଶ ଚର୍ଚ୍ଚା ଜୋର ଧରିଛି । କାହିଁକିନା ନିବେଶ ରାଜସ୍ଥାନ ସମ୍ମିଳନୀରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଦେଶର ଶିଳ୍ପପତି ଗୌତମ ଆଦାନୀଙ୍କ ସହ ମଞ୍ଚ ବାଣ୍ଟିଛନ୍ତି । ଏହା ସହ ସେ ଆଦାନୀଙ୍କୁ ପ୍ରଶଂସା କରିଥିବାର ଦେଖିବାକୁ ମିଳିଛି । ସେପଟେ କଂଗ୍ରେସ ଦଳ ନରେନ୍ଦ୍ର ମୋଦୀ ସରକାରଙ୍କୁ ମୁକେଶ ଅମ୍ବାନୀ ଏବଂ ଗୌତମ ଆଦାନୀଙ୍କୁ ଉପକୃତ କରୁଥିବା ଅଭିଯୋଗ କରିଛି । ଏଭଳି ପରିସ୍ଥିତିରେ ଆଦାନୀଙ୍କୁ ପ୍ରଶଂସା କରି ବିଜେପି ମୁଖ୍ୟମନ୍ତ୍ରୀ ଗେହଲୋଟଙ୍କ ଉପରେ ଆକ୍ରମଣ କରିଥିବାର ଦେଖିବାକୁ ମିଳିଛି । ଅନ୍ୟପଟେ ଅଶୋକ ଗେହଲୋଟ ଉକ୍ତ ସମ୍ମିଳନୀରେ କହିଛନ୍ତି ଯେ ଗୌତମ ଭାଇ ଗୁଜୁରାଟ କଥା କହୁଥିଲେ । ସ୍ୱାଧୀନତା ପୂର୍ବରୁ ମଧ୍ୟ ଗୁଜୁରାଟୀମାନେ ବହୁତ ଦକ୍ଷ ଅଟନ୍ତି । ପୂର୍ବରୁ ହିଁ ମହାରାଷ୍ଟ୍ର-ଗୁଜୁରାଟ ସବୁବେଳେ ଆର୍ଥିକ ଦୃଷ୍ଟିରୁ ସମୃଦ୍ଧ ରହିଆସିଛି । ବର୍ତମାନ ଆମେ ଶୁଣୁଛୁ ଯେ ଗୌତମ ଆଦାନୀ ଦୁନିଆର ଶ୍ରେଷ୍ଠ ଦୁଇ ଧନୀ ବ୍ୟକ୍ତିଙ୍କ ମଧ୍ୟରେ ଅଛନ୍ତି ବୋଲି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ କହିଛନ୍ତି । ଏ ଖବର ସାମ୍ନାକୁ ଆସିବା ପରେ ସାରା ଦେଶର ରାଜନୈତିକ ମାହୋଲ ବେଶ ଚଳଚଞ୍ଚଳ ହୋଇ ଉଠିଛି ।
