ଫୋକସ ପ୍ଲସ 17/3/23(ବ୍ୟୁରୋ): ଦିଲ୍ଲୀ AIIMS ଡାକ୍ତରଙ୍କ କମାଲ୍ । ଗର୍ଭସ୍ଥ ଶିଶୁର କଲେ ସଫଳ ବେଲୁନ୍ ଡାଏଲେସନ୍ । ଏକ ଗର୍ଭସ୍ଥ ଶିଶୁର ଅଙ୍ଗୁର ଆକାରର ହୃଦୟରେ ବନ୍ଦ ଭଲଭ୍ କୁ ଖୋଲିବାରେ ସଫଳ ହୋଇଛନ୍ତି ଦିଲ୍ଲୀ ଏମ୍ସର ଡାକ୍ତରୀ ଟିମ୍ । ଏହି ପ୍ରକ୍ରିୟାକୁ ଅଲଟ୍ରାସାଉଣ୍ଡ ମାର୍ଗଦର୍ଶନ ପ୍ରକ୍ରିୟାରେ କରାଯାଇଛି । ଏହି ଭଲଭ୍, ରକ୍ତ ହୃଦୟ ଆଡକୁ ଗଲାବେଳେ ଖୋଲିଥାଏ ଏବଂ ବିପରୀତ ଦିଗକୁ ଗଲେ ବନ୍ଦ ହୋଇଯାଏ । ହେଲେ ଜଣେ ମହିଳାଙ୍କ ଗର୍ଭରେ ଥିବା ଶିଶୁର ଏହି ଭଲଭ ବନ୍ଦ ହୋଇ ଯାଇଥିଲା, ଯାହାକୁ ଡାକ୍ତରମାନେ ଖୋଲିବାରେ ସଫଳ ହୋଇଛନ୍ତି । ମାତ୍ର 90 ସେକେଣ୍ଡରେ ଏହି ପ୍ରକ୍ରିୟାକୁ ଶେଷ କରାଯାଇଛି । କାର୍ଡିଅଲୋଜି ଆଣ୍ଡ୍ କାର୍ଡିଆକ୍ ଆନାସ୍ଥେସିଆ ବିଭାଗର ଡାକ୍ତରମାନେ ପ୍ରସୂତି ଏବଂ ସ୍ତ୍ରୀ ରୋଗ ବିଭାଗ ସହାୟତାରେ ଏହି ପ୍ରକ୍ରିୟା ଶେଷ କରିଛି । ଡାକ୍ତରଙ୍କ କହିବା ଅନୁସାରେ, ବର୍ତ୍ତମାନ ଉଭୟ ମାଆ ଓ ଶିଶୁ ସୁସ୍ଥ ଅଛନ୍ତି । ଏମ୍ସ ଡାକ୍ତରଙ୍କ ଏହି ସଫଳତାରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିୟ ଅଭିନନ୍ଦନ ଜଣାଇଛନ୍ତି । ଏଥିସହ ମାଆ ଓ ଶିଶୁର ଆସୁ ଆରୋଗ୍ୟ କାମନା କରିଛନ୍ତି । ଡାକ୍ତରଙ୍କ କହିବା ଅନୁସାରେ, ଶିଶୁର ହୃଦୟରେ ମାଆର ପେଟ ଦେଇ ଏକ ଛୁଞ୍ଚି ଭର୍ତ୍ତି କରାଯାଇଥିଲା । ତା’ପରେ ଏକ ବେଲୁନ୍ କ୍ୟାଥେଟର୍ ବ୍ୟବହାର କରି ରକ୍ତ ପ୍ରବାହରେ ଉନ୍ନତି ଆଣିବା ପାଇଁ ଅବରୋଧିତ ଭଲଭ୍କୁ ଖୋଲାଯାଇଥିଲା । ଏହି ପ୍ରକ୍ରିୟା ସଫଳତାର ସହ ସରିଛି । ଏହାପରେ ଶିଶୁର ହୃଦୟ ଠିକ୍ ଭାବରେ ବିକଶିତ ହୋଇପାରିବ ବୋଲି ଆଶା କରାଯାଉଛି । ଅଲଟ୍ରାସାଉଣ୍ଡ ମାର୍ଗଦର୍ଶନରେ ସମସ୍ତ କାର୍ଯ୍ୟ କରାଯାଇଛି ।
ଗର୍ଭସ୍ଥ ଶିଶୁର ବେଲୁନ୍ ଡାଏଲେସନ୍ କଲେ AIIMS ଡାକ୍ତର
