ଫୋକସ ପ୍ଲସ(ପାଲହଡା) ୨୮/୦୭/ ୨୦୨୨: କୁହାଯାଏ,ଯେତେବେଳେ ବିପଦ ଆସେ ତାହା ବନ୍ଧୁ ବାନ୍ଧବ କୁଟୁମ୍ବଙ୍କୁ ଧରି ଆସିଥାଏ | ଏହାର ସତ୍ୟତା ଦେଖାଦେଇଛି, ଅନୁଗୋଳ ଜିଲ୍ଲା ପାଲଲହଡା ବ୍ଲକ ଖେମେଳା ପଞ୍ଚାୟତ ବାରକୋଟିଆ ଗାଁରେ | ବାପା ମା’ ଙ୍କୁ ହରାଇ ଏବେ ବେସାହାରା ପାଲଟି ଯାଇଛି ଏହି ଗାଁର 16 ବର୍ଷର ଶିଶୁ ସୁମତି କିସାନ l ଆଜକୁ ଦଶ ବର୍ଷ ତଳେ କର୍କଟ ରୋଗରେ ଆକ୍ରାନ୍ତ ହୋଇ ପ୍ରାଣ ହରାଇଥିଲେ ସୁମତିର ମା ‘ | ଆଉ ବର୍ତ୍ତମାନ କୀଡୀନି ରୋଗରେ ପୀଡିତ ହୋଇ ସପ୍ତାହେ ତଳେ ବାପା ପ୍ରାଣ ହରାଇଛନ୍ତି | ବାପା ମାଙ୍କୁ ହରାଇ ସୁମତି ଭାଙ୍ଗି ପଡ଼ିଥିବା ବେଳେ ଏବେ ତାଙ୍କ ଭବିଷ୍ୟତକୁ ନେଇ ଚିନ୍ତା, କେମିତି ୨ ଓଳି ଖାଦ୍ୟ ଖାଇବେ, କେମିତି ପାଠ ପଢିବେ , ଓ କେମିତି ଚଳିବେ l ଏକଥା ଭାବିଲା ବେଳକୁ ବଡ଼ ଆଚମ୍ବିତ ଲାଗୁଛି l ବାପା ରୋଗରେ ଆକ୍ରାନ୍ତ ହେବା ସ୍ୱତେ ନିଜସ୍ୱ ଉଦ୍ୟମରେ ସୁମତିଙ୍କ ପାଠପଢା ଜାରି ରଖିଥିଲେ , ନିକଟରେ 411 ନମ୍ବର ରଖି ଦଶମ ପାସ ମଧ୍ୟ କରିଛନ୍ତି ସୁମତି l ହେଲେ କଲେଜରେ ପଢିବା ପାଇଁ ଇଛା ଥିଲେ ବି ଏସବୁ ତାଙ୍କ କ୍ଷେତ୍ରରେ ସମ୍ଭବ ପରି ଲାଗୁନାହିଁ l
ଏ ହେଉଛି ସେହି ଚାଳ ଛପର ଜରି ପାଲ ଟଙ୍ଗା ସନ୍ତସନ୍ତିଆ ଘର, ଯେଉଁଠି ବାପ ଝିଅ ବହୁ କଷ୍ଟରେ ରହୁଥିଲେ | ବହୁବାର ଏ ଅଫିସରୁ ସେ ଅଫିସକୁ ଦୌଡ଼ି ଦୌଡ଼ି ମଧ୍ୟ ଆବାସ ଯୋଜନାରେ ଘର ଖଣ୍ଡେ ମିଳି ପାରିଲା ନାହିଁ l ବାପା ବଞ୍ଚିଥିବା ବେଳେ ମାତ୍ର ମାସିକ 5 kg ଚାଉଳ ଯୋଗାଉ ଥିଲେ ସରକାର | ନିଜ ଚିନ୍ତାରେ ନିଜର ଆଖିର ଲୁହକୁ ମଧ୍ୟ ସମ୍ଭାଳି ପାରୁ ନାହାନ୍ତି ସୁମତି | ବାପାଙ୍କ ଶୁଦ୍ଧିକ୍ରିୟା ଏବଂ ସୁମତିଙ୍କ ପାଠପଢା ପାଇଁ ପ୍ରଶାସନ ତୁରନ୍ତ ଆର୍ଥିକ ପ୍ରଦାନ କରିବାକୁ ଦାବି କରିଛନ୍ତି ଗ୍ରାମବାସୀ ଏବଂ ପଡୋଶୀ | ସେପଟେ ଜିଲ୍ଲା ଶିଶୁସୁରକ୍ଷା ଅଧିକାରୀ କହିଛନ୍ତି, ସରକାରଙ୍କ ତରଫରୁ ସମସ୍ତ ସୁବିଧା ସୁଯୋଗ ଯୋଗାଇ ଦିଆଯିବ | ତେବେ ଦେଖିବାକୁ ବାକି ରହିଲା ପ୍ରଶାସନ ଓ ସରକାରଙ୍କ ତରଫରୁ ସୁମତିଙ୍କୁ କେଉଁ ପ୍ରକାରର ସହଯୋଗ ଯୋଗାଇ ଦିଆଯାଉଛି l
ପାଲହଡାରୁ ଖଗେଶ୍ୱର ପିଙ୍ଗୁଆଙ୍କ ରିପୋର୍ଟ ଫୋକସ ପ୍ଲସ |
