ଫୋକସ ପ୍ଲସ (ଗଣିଆ) ୧୯/୬/୨୦୨୨ : ଗଣିଆରେ ଦିନକୁ ଦିନ ମୋବାଇଲ ଚୋରି ରାକେଟ ବୃଦ୍ଧି ପାଇବାରେ ଲାଗିଛି l ଦୀର୍ଘଦିନଧରି ମୋବାଇଲ ଚୋରିକରି ଲୁଟେରାମାନେ ଲୋକଙ୍କୁ ଚକମା ଦେବାସହ ପୋଲିସ ଆଖିରେ ଧୂଳିଦେଇ ଚାଲିଯାଉଥିଲେ l ରବିବାର ଦିନ ଗଣିଆ ବଜାରରେ ସାପ୍ତାହିକ ହଟା ଚାଲିଥିବା ସମୟରେ ଗୋଟିଏ ନାବାଳକ ମୋବାଇଲ ଚୋରିକରୁଥିବା ସମୟରେ ସ୍ଥାନୀୟ ଲୋକମାନଙ୍କ ଦ୍ଵାରା ଧରାପଡ଼ିଥିଲା l ସ୍ଥାନୀୟ ଲୋକମାନେ ଉକ୍ତ ନାବାଳକକୁ ଗଣିଆ ଥାନାରେ ଜିମା ଦେଇଥିବା ଜଣାପଡିଛି l ସୂଚନା ଥାଉକି ଖୋର୍ଦ୍ଧା ଜିଲ୍ଲା ବାଂକୋଇ ଗ୍ରାମର ସୁଶାନ୍ତ କୁମାର ସୁବୁଦ୍ଧି ଏବଂ ଅନ୍ୟଜଣେ ବୌଦ୍ଧ ଜିଲ୍ଲା କୁମାରୀ ଗ୍ରାମର ସଞ୍ଜୟ ପ୍ରଧାନ ଦୁଇଜଣ ବ୍ୟକ୍ତି ଗଣିଆ ହାଟରୁ ପରିବା କିଣୁଥିବା ସମୟରେ କେହିଜଣେ ଦୁର୍ବୁତ୍ତ ସେମାନଙ୍କର ମୋବାଇଲ ଚୋରିକରିଥିବା ନେଇ ଗଣିଆ ଥାନାରେ ଲିଖିତ ଅଭିଯୋଗ କରିଛନ୍ତି l ତେବେ ଥାନାରେ ଅଟକଥିବା ନାବାଳକ ଜଣକ ଗଞ୍ଜାମ ଜିଲ୍ଲା ଆସ୍କା ଅଂଚଳର ପ୍ରେମ କୁମାର ବୟସ 10 ବର୍ଷ ବୋଲି ଜଣାପଡିଛି l ଏହି ମୋବାଇଲ ଚୋରୀରେ ନାବାଳକ ଜଣକ ଏକା ନା ଆଉ କେଉଁମାନେ ସମ୍ପୃକ୍ତ ଅଛନ୍ତି ତାହା ତଦନ୍ତ କଲେ ଜଣାପଡିବ ବୋଲି ଥାନାଅଧିକାରୀ ବିମଳ କୁମାର ମଲ୍ଲିକ ସୂଚନା ଦେଇଛନ୍ତି l ତେବେ ଗଣିଆ ପୋଲିସ ମୋବାଇଲ ଚୋରି ରାକେଟର ସନ୍ଧାନ ପାଉଛି କି ନାହିଁ ତାହା ଦେଖିବାକୁ ବାକି ରହିଲା l
ସମୀର କୁମାର ବେହେରାଙ୍କ ରିପୋର୍ଟ ଫୋକସ ପ୍ଲସ l
