ଛାତ୍ରଛାତ୍ରୀଙ୍କୁ ମାଡ଼ ମାରିଥିବା ଅଭିଯୋଗ

ଫୋକସ ପ୍ଲସ(କାମାକ୍ଷାନଗର): ଦଣ୍ଡ ମୁକ୍ତ ଅଞ୍ଚଳରେ ଲୁହା ରଡ଼ରେ ପିଟି ଦଣ୍ଡ ଦେଲେ ପ୍ରଧାନ ଶିକ୍ଷୟିତ୍ରୀ ଦିଦି । ଏଭିଳି ସଙ୍ଗିନ ଅଭିଯୋଗ ଢେଙ୍କାନାଳ ଜିଲ୍ଲା କାମାକ୍ଷାନଗର ବ୍ଲକ ପୁରୁଣାରେକୁଳା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପୁଷ୍ପଲତା ଶତପଥୀଙ୍କ ବିରୋଧରେ ଆସିଛି । ଦିଦି ପୁଷ୍ପଲତା ଏକ ଲୁହା ରଡ଼ରେ ବିଦ୍ୟାଳୟର ପଞ୍ଚମ ଶ୍ରେଣୀର ଛାତ୍ରଛାତ୍ରୀ ମାନଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି । ଯାହାକୁ ନେଇ ଛାତ୍ରଛାତ୍ରୀଙ୍କ ଅଭିଭାବକ ମାନେ ଦୀର୍ଘ ସମୟ ଧରି ପ୍ରଧାନ ଶିକ୍ଷୟିତ୍ରୀଙ୍କୁ ବିଦ୍ୟାଳୟରେ ଘେରିଥିଲେ । ତୁରନ୍ତ ପ୍ରଧାନ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି ପାଇଁ ସେମାନେ ଦାବି କରିଥିଲେ । ଏ ନେଇ କାମାକ୍ଷାନଗର ବ୍ଲକ ଏବିଓ ପୁରୁଣାରେକୁଳା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ପହଞ୍ଚି ଛାତ୍ରଛାତ୍ରୀଙ୍କ ଅଭିଭାବକଙ୍କୁ ବୁଝା ସୁଝା କରିବା ସହ ଘଟଣାଟିର ତଦନ୍ତ କରାଯାଇ ଆକ୍ସନ ନେବାକୁ ସେ ପ୍ରତିଶ୍ରୁତି ଦେଇଥିଲେ । ଏବିଓଙ୍କ ପ୍ରତିଶ୍ରୁତି ପରେ ଛାତ୍ରଛାତ୍ରୀ ଓ ଅଭିଭାବକ ମାନେ ଆନ୍ଦୋଳନରୁ ଓହରିଥିଲେ ।

କାମାକ୍ଷାନଗରରୁ ସମଦର୍ଶୀ ଦାସଙ୍କ ରିପୋର୍ଟ