ଓଡ଼ିଶାରେ ବିଜେଡି -ବିଜେପି ମଧ୍ୟରେ ମହା ଲଢେଇ

ଫୋକସ ପ୍ଲସ 12/3/23(ବ୍ୟୁରୋ): ଆଗକୁ 2024 ଲୋକସଭା ନିର୍ବାଚନ ପାଖେଇ ଆସୁଛି | ଏହା ପୂର୍ବରୁ ଚଳିତ ବର୍ଷ 6ଟି ରାଜ୍ୟରେ ବିଧାନ ସଭା ନିର୍ବାଚନ ହେବାକୁ ଅଛି | ନିକଟରେ ପ୍ରକାଶ ପାଇଥିବା 3ଟି ରାଜ୍ୟରେ ବିଜେପି ସରକାର ଗଠନ କରିଛି | ତେଣୁ ଏବେ ବିଜେପିର ନଜର ଅନ୍ୟ ରାଜ୍ୟ ଉପରେ ରହିଛି | ତେବେ ସେହି ରାଜ୍ୟ ମାନଙ୍କ ମଧ୍ୟରୁ ବିଜେପି ଏବେ ଓଡିଶାକୁ ଅଧିକ ଗୁରୁତ୍ବ ଦେଉଛି | ସେଥିପାଇଁ ବହୁ ବର୍ଷ ଧରି ରାଜ୍ୟରେ ନିଜର ଶାସନ ବଜାୟ ରଖିଥିବା ବିଜେଡ଼ିକୁ ହଟାଇ ସରକାର ଗଠନ କରିବା ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି ବିଜେପି |ସୂଚନା ଅନୁସାରେ ଖୁବ ଶୀଘ୍ର ଓଡିଶା ଆସୁଛନ୍ତି ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ,ଗୃହ ମନ୍ତ୍ରୀ ଅମିତ ସାହ ,ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ଅନ୍ୟ କେନ୍ଦ୍ରୀୟ ନେତ୍ରୁ ବୃନ୍ଦ | ତେବେ ପୂର୍ବ ଅପେକ୍ଷା ଗତ କିଛି ବର୍ଷ ମଧ୍ୟରେ ଓଡ଼ିଶାରେ ବିଜେପିର ପ୍ରଦର୍ଶନରେ ବୃଦ୍ଧି ଘଟିଥିବା ଦେଖିବାକୁ ମିଳିଛି |ଏକଦା ପାଖ ପାଖି 17 ପ୍ରତିଶତ ଭୋଟ ପାଉଥିବା ବିଜେପି ଏବେ 40 ପ୍ରତିଶତରେ ପହଂଚି ଯାଇଛି |ଆଉ ନିଜର ଅକ୍ତିଆର ବିସ୍ତାର କରିବାରେ ଲାଗିଛି |ତେଣୁ ଗତ 9 ବର୍ଷର ଉପଲବ୍ଧିକୁ ନେଇ ଲୋକଙ୍କ ନିକଟକୁ ଯିବାକୁ ପ୍ରସ୍ତୁତ ହେଉଛି ବିଜେପି |କେନ୍ଦ୍ରୀୟ ନେତା ମାନେ ଓଡିଶା ଆସିବା ନେଇ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୂଚନା ମଧ୍ୟ ଦେଇଛନ୍ତି | ଅନ୍ୟ ପକ୍ଷରେ ନବୀନ ପତ୍ତନୟକଙ୍କ ଆଗରେ ମୋଦି ,ଶାହାଙ୍କ ଯାଦୁ କାମ କରିବନି ବୋଲି ବିଜେଡି ପାଖରୁ ପ୍ରତିକ୍ରିୟା ମିଳିଛି | ଗତ 2019 ନିର୍ବାଚନରେ ବିଜେପି ଓଡ଼ିଶାରେ ଡବଲ ଇଂଜିନ ସରକାର ଗଠନର ନାରା ଦେଇଥିଲା |ଯଦିଓ ଦଳ ଏହି ଲକ୍ଷ ହାସଲ କରିବା କ୍ଷେତ୍ରରେ ବିଜେଡି ଆଗରେ ହାର ମାନିଥିଲା ତଥାପି ଦଳ ଅଧିକ ସଂଖ୍ୟକ ଲୋକସଭା ଓ ବିଧାନ ସଭା ସିଟ ଅକ୍ତିଆର କରିବାରେ ସକ୍ଷମ ହୋଇଥିଲା ତେଣୁ ଏଥର ଓଡିଶାକୁ ନେଇ ଦିଲ୍ଲୀ ରାଜନୀତି ମଧ୍ୟ ଚଳଚଂଚଳ ହେଉଥିବା କୁହାଯାଉଛି | କେଉଁ ନେତାଙ୍କୁ କେଉଁ ଦାୟିତ୍ୱ ଦିଆଯିବ ତାହା କେନ୍ଦ୍ରୀୟ ନେତୃତ୍ୱ ସ୍ଥିର କରିବେ | ଓଡ଼ିଶାରେ କ୍ଷମତା ଅକ୍ତିଆର କରିବା ପାଇଁ ଏବେ ସବୁ ଦଳ ନିଜର ବଳ ପ୍ରୟୋଗ କରୁଛନ୍ତି | ତେବେ ନିର୍ବାଚନ ପାଇଁ ଆଉ କମ ସମୟ ବାକିଥିବା ବେଳେ ଏହା ମଧ୍ୟରେ ପିଏମ ମୋଦି ଓଡିଶା ଗସ୍ତରେ ଆସିବା ନେଇ ସୂଚନା ରହିଛି | | ମୋଦି ରାଜ୍ୟ ଗସ୍ତ କରି ରେଳ ଓ ସଡ଼କ ପ୍ରକଳ୍ପର ଶୁଭାରମ୍ଭ କରିବେ | ତେବେ ଜାତୀୟ ଗଣତାନ୍ତ୍ରିକ ମେଣ୍ଟ ସରକାରଙ୍କ ଯୋଜନାକୁ ରାଜ୍ୟବାସୀଙ୍କ ନିକଟରେ ପହଞ୍ଚି କିଭଳି ବଭୋଟରଂକୁ ଆକୃଷ୍ଟ କରାଯିବ ସେଥିପାଇଁ ବିଧାନ ସଭା ଓ ଲୋକସଭା ପାଇଁ 20 ଜଣିଆ କୋ କମିଟି ଗଠନ କରାଯିବ | ଏହି କମିଟି ପ୍ରତି ମାସରେ ବୈଠକ କରି କ୍ଷେତ୍ର ଦାୟିତ୍ୱରେ ଥିବା କେନ୍ଦ୍ର ମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରିବେ | ସୂଚନା ଅନୁସାରେ ରାହୁଲ ଗାନ୍ଧୀଙ୍କ ଭାରତ ଜୋଡ ଯାତ୍ରାରେ ଉତ୍ସାହିତ ହୋଇ ପ୍ରଦେଶ କଂଗ୍ରେସ କମିଟି ସଭାପତି ଶରତ ପତ୍ତନୟକ ଆସନ୍ତା ନିର୍ବାଚନରେ କଡା ଫାଇଟ କରିବାକୁ ଲକ୍ଷ ରଖିଛନ୍ତି | ଏହା ମଧରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ର ଶେଖର ରାଓଙ୍କ ଭାରତ ରାଷ୍ଟ୍ର ସମିତି ଓଡ଼ିଶାରେ କିଛି ପୁରୁଣା ନେତାଙ୍କୁ ଦଳରେ ସାମିଲ କରିସାରିଲେଣି | ତେବେ ଅରବିନ୍ଦ କେଜ୍ରିୱାଲଙ୍କ ଆମ ଆଦମୀ ପାର୍ଟି ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣ ମୂଳ କଂଗ୍ରେସ ମଧ୍ୟ ଓଡିଶାରେ ନିଜର ବ୍ରାଞ୍ଚ ଖୋଲିବା ନେଇ ଉଦ୍ୟମ ଚଳାଇଛି | ତେଣୁ ଆସନ୍ତା ନିର୍ବାଚନରେ ବିଜେପିକୁ ବିଜେଡି ,କଂଗ୍ରେସ ,ଆପ ,ବିଆରଏସ ,ଟିଏମସି ପରି ପଂଚରଥିଙ୍କ ସହ ମୁକାବିଲା କରିବାକୁ ପଡିପାରେ ବୋଲି ଏବେଠୁ ଖୁବ ଚର୍ଚା ହେଉଛି | ତେବେ ଆଗାମୀ ସମୟରେ ହିଁ ଜଣାପଡିବ ବିଜେପି ନିଜର କାୟା ବିସ୍ତାର କରିବାରେ କେତେ ସକ୍ଷମ ହେଉଛି |