ସବୁଥାଇ ବି ବେସାହାରା ଚମ୍ପା

ଫୋକସ ପ୍ଲସ 13/3/23(ବ୍ୟୁରୋ): ବୁଢୀ ମାଉସୀ ଆଖିରୁ ଲୁହ ଶୁଖୁନି । ବୟସ ହେଇଗଲାଣି ତ । ଆଉ ଆଖିକୁ ବି ଭଲଭାବରେ ଦିଶୁନି । ଅଣ୍ଡାଳି ଅଣ୍ଡାଳି ବାଡି ଧରି ବାଟ ଚାଲିବାକୁ ପଡୁଛି । ଆଉ ରାତି ହେଲେ ଏହି ନୁଆଁଣିଆ ଛପର ତଳେ ପାଲ ଖଣ୍ଡେ ପାରି ଶୋଇବାକୁ ପଡୁଛି । ୟାର ମାନେ ନୁହେଁ ଯେ, ମାଉସୀଙ୍କର କିଛି ଧନସମ୍ପତି ନାହିଁ । ହେଲେ ସବୁକିଛି ଥାଇ ବି ଆଜି ଅସହାୟ ହୋଇ ପଡି ରହିଛନ୍ତି ଏହି ବୃଦ୍ଧା ଜଣକ । ଛପର ତଳେ ଶୋଇ ରହିଥିବା ଏହି ବୁଢୀ ମାଉସୀ ଜଣକ ହେଉଛନ୍ତି ଢେଙ୍କାନାଳ ଜିଲ୍ଲା କଙ୍କଡାହାଡ ବ୍ଲକ କେରୋଯୋଳି ପଂଚାୟତ ରୋଡଙ୍ଗ ଗାଁର ଚମ୍ପା ସିଂହ । ବୃଦ୍ଧାବସ୍ଥାରେ ସେବା କରିବା ବଦଳରେ ତାଙ୍କର ଭତା ଓ ରାସନ ଚାଉଳ ନେଇ ଚମ୍ପାଙ୍କୁ ବେସାହାରା କରି ଦେଇଛନ୍ତି ତାଙ୍କ ପୁତୁରା ।
ନିଜର ସ୍ୱାମୀ ଓ ପିଲାମାନେ ଆରପାରିକୁ ଚାଲିଯିବା ପରେ ତାଙ୍କ ପୁତୁରା ପଙ୍କଜ ସିଂହ ବୁଢୀ ମାଆର ସେବା କରିବା ପାଇଁ ଚମ୍ପାଙ୍କୁ ନିଜ ଘରକୁ ନେଇଥିଲେ । ଯେ ପର୍ଯ୍ୟନ୍ତ ଚମ୍ପା ସୁସ୍ଥ ଥିଲେ, ସେ ପର୍ଯ୍ୟନ୍ତ ତାଙ୍କର ରାସନ ଚାଉଳ ଓ ଭତା ସହ ତାଙ୍କୁ ଘରେ ଆଶ୍ରୟ ଦେଇଥିଲା ପୁତୁରା ପଙ୍କଜ । କିନ୍ତୁ ଯେତେବେଳେ ଚମ୍ପା ଧିରେଧିରେ ଅସୁସ୍ଥ ହୋଇଆସିଲେ, ସେତେବେଳେ ତାଙ୍କର ସେବା କରିବା ପରିବର୍ତେ ତାଙ୍କର ଭତା ଓ ରାସନ ଚାଉଳ ରଖିଦେଇ ତାଙ୍କୁ ବେସାହାରା କରି ଘରୁ ବାହାର କରି ଦେଇଛନ୍ତି ପଙ୍କଜ । ଏବେ ଗାଁର ଜଣେ ବ୍ୟକ୍ତି ତାଙ୍କୁ ରହିବା ପାଇଁ ଏହି ଛପରଟି କରି ଦେଇଥିବା ବେଳେ ଗାଁଲୋକେ ମିଶି ତାଙ୍କୁ ଖାଇବାକୁ ଦେଉଛନ୍ତି । ଏଭଳି ପରିସ୍ଥିତିରେ ଏହି ଅସହାୟ ବୃଦ୍ଧାଙ୍କର ସାହାରା କିଏ ହେବ ଏବଂ ସେ ତାଙ୍କ ରାସନ କାର୍ଡ, ଭତା ସହ ଜମିବାଡି କିପରି ଫେରି ପାଇବେ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ତେବେ ଅସହାୟ ବୃଦ୍ଧା ଚମ୍ପାଙ୍କ ଉପରେ ସରକାର ତଥା ଜିଲ୍ଲା ପ୍ରଶାସନ ଦୃଷ୍ଟି ଦେବାସହ ତାଙ୍କର ଧନ ସମ୍ପତି ଫେରାଇ ଦେବାପାଇଁ ଗ୍ରାମବାସୀ ଦାବି କରିଛନ୍ତି ।