ଆଉ ସହିପାରୁନୁ ବୋହୂର ଅତ୍ୟାଚାର
- Breaking newsଅପରାଧଆଞ୍ଚଳିକରାଜ୍ୟସ୍ପେସିଆଲ ଷ୍ଟୋରି
- March 22, 2023
- No Comment
- 223
ଫୋକସ ପ୍ଲସ 22/3/23(ବ୍ୟୁରୋ): ଅନ୍ତ ଫାଡ଼ି ଜନ୍ମ ଦେଇଥିବା ମା ଆଉ ବାପା ଆଜିର ସମାଜରେ ନିଷ୍ଠୁର ଭାବରେ ଅତ୍ୟାଚାରିତ ହେଉଥିବା ଦୃଶ୍ୟ ଦେଖିବାକୁ ମିଳୁଛି। ଏମିତି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ନାଉଗାଁ ବ୍ଲକ୍ ତେଲସରା ଗ୍ରାମରେ ।
ଦଦରା ଆଜବେଷ୍ଟସ ସାଙ୍ଗକୁ ବାଖରାଏ ଦରଭଙ୍ଗା ଘର । ସେଇଠି ରୁହନ୍ତି ୮୩ ବର୍ଷୀୟ ଶ୍ରୀଧର ବିଶ୍ଵାଳ ଓ ତାଙ୍କ ବୃଦ୍ଧା ପତ୍ନୀ ଝୁମଲତା ବିଶ୍ଵାଳ । ପାକଳ ବୟସ ସାଙ୍ଗକୁ ଧୋଡକା ଚମ , ଆଉ ଏପଟେ ଶ୍ରୀଧର କର୍କଟ ରୋଗରେ ପୀଡିତ । ପୁଅର ମୃତ୍ୟୁ ପରେ ବୋହୂ ମିତାଲି ବିଶ୍ଵାଳ ଏମାନଙ୍କୁ ପ୍ରତ୍ୟେକ ମୁହୂର୍ତ୍ତରେ ଅତ୍ୟାଚାର କରିବା ସହ ମାଡ଼ ମାରିବା କଥା ଶ୍ରୀଧର ଏବଂ ଝୁମଲତା କାନ୍ଦି କାନ୍ଦି ପ୍ରକାଶ କରିଛନ୍ତି । ଏପରିକି ବୃଦ୍ଧ ବୟସରେ ବୋହୂ ସେମାନଙ୍କୁ ଖାଇବାକୁ ଗଣ୍ଡେ ନଦେଇ ଅଲଗା ମଧ୍ୟ କରିଦେଇଛି । ଅନ୍ୟପକ୍ଷରେ ଶ୍ରୀଧରଙ୍କ ବୟସ ୮୦ ବର୍ଷରୁ ଉର୍ଦ୍ଧ୍ବ ହୋଇଥିଲେ ମଧ୍ୟ ତାଙ୍କର ବାର୍ଦ୍ଧକ୍ୟ ଭତ୍ତା ଟଙ୍କା ୫୦୦ ଟଙ୍କାରୁ ୭୦୦ କରାଯାଇ ପାରି ନାହିଁ । ସେହିପରି ଦୁଇଜଣଙ୍କୁ ୧୦ କିଗ୍ରା ଚାଉଳ ମିଳୁଥିବାରୁ ସେତିକିରେ ମାସେ ଚଳିବା ଅସମ୍ଭବ ବୋଲି ସେମାନେ କହିଛନ୍ତି । ସେମାନଙ୍କ କହିବା ମୁତାବକ ରୋଷେଇ ସମୟରେ ଟାଣ ଖରାରୁ ରକ୍ଷା ପାଇବାକୁ ତିଆରି କରିଥିବା ଏକ ଛୋଟ ଚାଳ ଘରକୁ ମିତାଲି ଭାଙ୍ଗିଦେବା ସହ ଅଟକେଇବାରୁ ସେମାନଙ୍କୁ ମାଡ଼ ମାରିଛି। ଅଧିକ କହିଲେ ଜୀବନରୁ ମାରିଦେବାର ଧମକ ମଧ୍ୟ ଦେଇଚି ବୋହୂ । ଏନେଇ ଗାରୋଇ ଫାଣ୍ଡିରେ ଦୁଇ ବୃଦ୍ଧ ଓ ବୋହୂ ମିତାଲି ଲିଖିତ ଅଭିଯୋଗ କରିବା ପରେ ଉପଯୁକ୍ତ ତଦନ୍ତ କରାଯାଇ ତୁରନ୍ତ ପଦକ୍ଷେପ ନିଆଯିବ ବୋଲି ଫାଣ୍ଡି ଅଧିକାରୀ ସୁଶାନ୍ତ କୁମାର ପଣ୍ଡା ପ୍ରକାଶ କରିଛନ୍ତି । ଦେଖିବାକୁ ବାକି ରହିଲା କେବେ ଦୁଇ ବୃଦ୍ଧଙ୍କୁ ନ୍ୟାୟ ମିଳିବ ଆଉ କେବେ ନାଉଗାଁ ବ୍ଲକ୍ ପ୍ରଶାସନ ଏମାନଙ୍କ ଉପରେ ଦୃଷ୍ଟି ଦେଉଛି ।