ଅପରାଧୀଙ୍କ ଆଶ୍ରୟସ୍ଥଳ ବସ୍ତି: ଅଧିକ ଭଡ଼ା‌ ପ୍ରଲୋଭନରେ ପାଉଛନ୍ତି ପ୍ରଶ୍ରୟ

ଭୁବନେଶ୍ବର: ରାଜଧାନୀର ବସ୍ତିଗୁଡ଼ିକ ପାଲଟିଛି ଅପରାଧୀଙ୍କ ଆଡ଼ାସ୍ଥଳୀ। ପରିଚୟ ଗୋପନ ରଖି ସେମାନେ ଘର ଭଡ଼ା ନେଉଛନ୍ତି। ଅଧିକ ଭଡ଼ା ଦେବାର ପ୍ରଲୋଭନ ଦେଖାଇବାରୁ ବସ୍ତିରେ ଘର ଭଡ଼ା ଦେଉଥିବା ବାସିନ୍ଦାମାନେ ସେମାନଙ୍କୁ ଘର ଦେଉଛନ୍ତି। ସେମାନେ ନିଜର ପରିଚୟ ଲୁଚାଇବାକୁ ଚେଷ୍ଟା କରୁଥିବା ବେଳେ ଅଧିକ ଭଡ଼ା ପାଇବା ଲୋଭରେ ଘର ମାଲିକ ବି ପରିଚୟ ଖୋଜୁ ନାହିଁ। ରାଜଧାନୀରେ ଅପରାଧ ଘଟାଇ ଅପରାଧୀମାନେ ଫେରାର୍ ହୋଇଯାଉଛନ୍ତି ଓ ମାମଲା ଥଣ୍ଡା ପଡ଼ିଗଲେ ପୁଣି ଆସି ବସ୍ତିରେ ରହୁଛନ୍ତି। ବସ୍ତିରେ ସହଜରେ ଘର ଭଡ଼ା ମିଳୁଥିବାରୁ ନିଶା ବେପାରୀଙ୍କଠାରୁ ଆରମ୍ଭ କରି ଲୁଟେରା ଓ ଡକାୟତମାନେ ଆତ୍ମଗୋପନ କରିବାକୁ ମଉକା ପାଉଛନ୍ତି। ଏଣେ କମିସନରେଟ୍‌ ପୁଲିସ ବସ୍ତିକୁ ଅପରାଧମୁକ୍ତ ଓ ନିଶାମୁକ୍ତ କରିବାକୁ ବିଭିନ୍ନ କାର୍ଯ୍ୟକ୍ରମ ହାତକୁ ନେଉଥିଲେ ବି ଘର ଭଡ଼ା ଦେଉଥିବା ବସ୍ତିର ପ୍ରଭାବଶାଳୀ ଲୋକମାନଙ୍କ ଯୋଗୁଁ ସେସବୁ ଫଳପ୍ରଦ ହେଉ ନାହିଁ।

ପୁଲିସ ବସ୍ତିମିତ୍ର ଓ ପୁଲିସ ମିତ୍ର ଭଳି ଯୋଜନା କରିଛି। ବସ୍ତି ପରିବେଶକୁ ସୁସ୍ଥ ଓ ଅପରାଧମୁକ୍ତ କରି ରଖିବା ପାଇଁ କିଛି ସ୍ବେଚ୍ଛାସେବୀ ପୁଲିସକୁ ସହଯୋଗ କରିବାକୁ ଅଣ୍ଟା ଭିଡ଼ୁଛନ୍ତି। କିନ୍ତୁ ବସ୍ତିରେ ବେଆଇନ କାମକୁ ପ୍ରଶୟ ଦେଉଥିବା ବ୍ୟକ୍ତିମାନେ ସେମାନଙ୍କୁ ଟାର୍ଗେଟ୍‌ କରିବା ଦେଖାଯାଉଛି। ବସ୍ତିରେ ଅଧିକ ଜମି ଜବରଦଖଲ କରି ଘର ଭଡ଼ା ଲଗାଉଥିବା କିଛି ପ୍ରଭାବଶାଳୀ ଲୋକ ସେମାନଙ୍କ କଳା କାରନାମା ଧରାପଡ଼ିବା ଭୟରେ ଏହି ମିତ୍ରମାନଙ୍କୁ ନାନାପ୍ରକାର ହଇରାଣ କରୁଛନ୍ତି। ସେମାନଙ୍କ ସ୍ବାର୍ଥରେ ବାଧା ଉପୁଜିବା ଆଶଙ୍କାରେ ସେମାନେ ମିତ୍ରମାନଙ୍କୁ ବହୁ ସମୟରେ ପରୋକ୍ଷରେ ଧମକଚମକ ଦେଉଛନ୍ତି। ଫଳରେ ବିନା କାରଣରେ ମିତ୍ରମାନେ ସେମାନଙ୍କ ଆକ୍ରୋଶର ଶିକାର ହେଉଛନ୍ତି। ପୁଣି ବସ୍ତି ତଥା ପୁଲିସ ମିତ୍ରଙ୍କ ନଜରରୁ ବର୍ତ୍ତିବା ପାଇଁ ଘର ଭଡ଼ା ଦେଉଥିବା ଅସାଧୁ ଲୋକମାନେ ଭଡ଼ାଟିଆଙ୍କୁ ନିଜ ସମ୍ପର୍କୀୟ ବୋଲି କହିବାକୁ ପଛାଉ ନାହାନ୍ତି। ଏମିତିକି ଭଡ଼ା ନେଇଥିବା ଅପରାଧୀ ଫେରାର୍ ରହୁଥିବା ବେଳେ ଘର ଖାଲି ରହୁଥିବା ନେଇ ସେମାନେ ସମ୍ପର୍କୀୟ ବ୍ୟକ୍ତି ବାହାରକୁ ଜରୁରୀ କାମରେ ଯାଇଛନ୍ତି ବୋଲି ସଫେଇ ଦେଉଛନ୍ତି। ତେଣୁ ମିତ୍ରମାନେ ସଠିକ୍ ତଥ୍ୟ ପାଇବାରେ ସମର୍ଥ ହେଉନାହାନ୍ତି।