ନୂଆଦିଲ୍ଲୀ: ଆଗକୁ ଭାରତରେ ଘଟିବାକୁ ଯାଉଛି ବଡ ଧରଣର ଅଘଟଣ । ଆମେରିକାର ଏକ କ୍ଷୁଦ୍ର ବିକ୍ରେତା ସଂସ୍ଥା ହିଣ୍ଡେନବର୍ଗ ରିସର୍ଚ୍ଚ ନିକଟରେ ଏକ ବଡ ଘୋଷଣା କରିଛି ଯାହା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିବା ସହିତ ଆତଙ୍କିତ ମଧ୍ୟ କରିଛି। ଏଲନ୍ ମସ୍କଙ୍କ ସୋସିଆଲ ମିଡ଼ିଆ ପ୍ଲାଟଫର୍ମ ଏକ୍ସରେ ଶନିବାର ସକାଳେ ଏକ ପୋଷ୍ଟ୍ ମାଧ୍ୟମରେ ହିଣ୍ଡେନବର୍ଗ ସୂଚାଇ ଦେଇଛି ଯେ ଖୁବ୍ ଶୀଘ୍ର ଭାରତରେ କିଛି ବଡ଼ ଧରଣର ଘଟଣା ଘଟିବାକୁ ଯାଉଛି । ନାଥନ ଆଣ୍ଡରସନଙ୍କ ଦ୍ବାରା ପରିଚାଳିତ ହେଉଥିବା ହିଣ୍ଡେନବର୍ଗର ଏଭଳି ପୋଷ୍ଟ ନେଇ ଏବେ ଦେଶରେ ଚର୍ଚ୍ଚା ଆରମ୍ଭ ହୋଇଗଲାଣି । ହିଣ୍ଡେନବର୍ଗ ଏହି ଘୋଷଣାରେ କୌଣସି ପ୍ରକାର ବିସ୍ତୃତ ସୂଚନା ଦେଇନାହିଁ। ମାତ୍ର ଏଭଳି ପୋଷ୍ଟ କୁ ଦେଖି ଏବେ ଅନୁମାନ କରାଯାଉଛି ଯେ ହିଣ୍ଡେନବର୍ଗ ପୁଣି ଥରେ ଆଉ ଏକ ଭାରତୀୟ କମ୍ପାନୀ ବିଷୟରେ ଏକ ବଡ଼ ଖୁଲାସା କରିବାକୁ ଯାଉଛି। ଏହାପୂର୍ବରୁ ଜାନୁୟାରୀ ୨୦୨୩ରେ, ହିଣ୍ଡେନବର୍ଗ ରିସର୍ଚ୍ଚ ଏକ ରିପୋର୍ଟ ପ୍ରକାଶ କରି ଭାରତର ବଡ ବ୍ୟବସାୟୀ ଗୌତମ ଆଦାନୀଙ୍କ ଆଦାନୀ ଗ୍ରୁପ୍ ବିରୋଧରେ ଗୁରୁତର ଅଭିଯୋଗ ଆଣିଥିଲା। ଏହି ରିପୋର୍ଟ ପ୍ରକାଶ ପାଇବା ପରେ ବଜାରରେ ବଡ ଧରଣର ଆତଙ୍କ ସୃଷ୍ଟି କରିଥିଲା ଏବଂ ଏହା ଦ୍ୱାରା ଆଦାନୀ ଗ୍ରୁପ୍ର ସେୟାରରେ ବହୁତ ପରିମାଣର ହ୍ରାସ ଘଟିଥିଲା। ଯାହାଦ୍ୱାରା ଗୌତମ ଆଦାନୀଙ୍କ ସମ୍ପତ୍ତିରେ ମଧ୍ୟ ବହୁ ପରିମାଣର ହ୍ରାସ ମଧ୍ୟ ଘଟିଥିଲା ଏବଂ ସେ ବିଶ୍ବର ୨ ନମ୍ବର ବିଲିୟନେୟାର ତାଲିକାରୁ ୩୬ ନମ୍ବରକୁ ଚାଲିଯାଇଥିଲେ।
