ନବୀନଙ୍କୁ ଛାଡ଼ୁନି କି ପାଣ୍ଡିଆନଙ୍କ ପ୍ରେମ | ପାଣ୍ଡିଆନଙ୍କ ପ୍ରେମରେ ଏବେ ବି ଅନ୍ଧ ଅଛନ୍ତି ନବୀନ | ପୁଣି ଏବେ ପାଣ୍ଡିଆନଙ୍କ ସପକ୍ଷରେ ବାହାରିଛନ୍ତି ନବୀନ | ନିକଟରେ ନବୀନ ପଟ୍ଟନାୟକ ଏବ ପାଣ୍ଡିଆନକୁ ନେଇ ଏକ ଇଂରାଜୀ ଦୈନିକ ଖବର କାଗଜରେ ପ୍ରକାଶିତ ଖବରକୁ ଖଣ୍ଡନ କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଖବରକୁ ସମ୍ପୂର୍ଣ୍ଣ ମିଥ୍ୟା ଏବଂ ଉଦ୍ଦେଶ୍ୟମୂଳକ ବୋଲି କହି ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି ନବୀନ । ସୋସିଆଲ ମିଡିଆରେ ସେ ଲେଖିଛନ୍ତି ଯେ ,ମୁଁ ପୂର୍ବରୁ ମଧ୍ୟ କହିଥିଲି ପାଣ୍ଡିଆନ ରାଜ୍ୟ ଓ ଦଳ ପାଇଁ ନିଷ୍ଠାପର ଭାବେ କାମ କରିଥିଲେ । ସଂପୂର୍ଣ୍ଣ ସମର୍ପଣ ମନୋଭାବ ସହିତ,ଦକ୍ଷତା ଏବଂ ନିଷ୍ଠାର ସହ ସେ ସେବା କରିଛନ୍ତି । ପାଣ୍ଡିଆନ ଙ୍କର ଏହି ଦକ୍ଷତା ଓ ନିଷ୍ଠା ପାଇଁ ସେ ସବୁଆଡେ ଜଣାଶୁଣା’ ବୋଲି କହିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏହା ପୂର୍ବରୁ ବି ପୂର୍ବରୁ ପାଣ୍ଡିଆନ ଙ୍କ ସପକ୍ଷରେ ବାହାରିଥିଲେ ନବୀନ । ଚଳିତ ନିର୍ବାଚନରେ ବିଜେଡି ର ଶୋଚନୀୟ ପରାଜୟ ପରେ ଭିକେ ପାଣ୍ଡିଆନଙ୍କୁ ନେଇ ଚାରିଆଡେ ବିରୋଧର ସ୍ୱର ଉଠିଥିଲା । ଏମିତିକି ଦଳରେ ଥିବା ଅନେକ ଛାମୁଆ ନେତା ମଧ୍ୟ ପ୍ରତ୍ୟକ୍ଷ ଏବଂ ପରୋକ୍ଷ ଭାବରେ ଦଳର ଏଭଳି ପରାଜୟ ପାଇଁ ତାଙ୍କୁ ଦାୟୀ କରିଥିଲେ | ବିଭିନ୍ନ ମହଲରୁ ପାଣ୍ଡିଆନଙ୍କୁ ମଧ୍ୟ ସମାଲୋଚନା କରାଯାଇଥିଲା । ତେବେ ଏହି ସମୟରେ ନିଜର ପ୍ରତିକ୍ରିୟା ରଖିଥିଲେ ନବୀନ ପଟ୍ଟନାୟକ । ସେତେବେଳେ ସେ ଦଳର ଏଭଳି ସ୍ଥିତି ଏବଂ ପରାଜୟ ପାଇଁ ତାଙ୍କୁ ଦାୟୀ ନ କରି ବରଂ ଭିକେ ପାଣ୍ଡିଆନଙ୍କୁ କ୍ଲିଟଚିଟ୍ ଦେଇଥିଲେ ।
ପରାଜୟ ପରେ ତାଙ୍କୁ ନେଇ କରାଯାଉଥିବା ସମାଲୋଚନାକୁ ଦୁର୍ଭାଗ୍ୟଜନକ ବୋଲି କହିଥିଲେ ନବୀନ । ସେ ଆହୁରି ମଧ୍ୟ କହିଥିଲେ ଯେ, ପାଣ୍ଡିଆନ୍ ଜଣେ ଅଫିସର ଭାବେ କାମ କରି ଅବସର ନେଇ ବିଜେଡିରେ ମିଶିଥିଲେ। ସେ କୌଣସି ପଦ ପଦବୀରେ ନଥିବା ସହ ନିର୍ବାଚନ ମଧ୍ୟ ଲଢ଼ି ନାହାନ୍ତି। ପାଣ୍ଡିଆନ୍ ଜଣେ ନିଷ୍ଠାବାନ ଓ ସଚ୍ଚୋଟ ବ୍ୟକ୍ତି । ସେ ଏଥିପାଇଁ ସବୁଦିନ ମନେ ରହିବେ ବୋଲି କହିଥିଲେ ନବୀନ । ଏବେ ପୁଣି ଥରେ ସେହି ପୁରୁଣା କଥାକୁ ଦୋହରାଇଛନ୍ତି ନବୀନ। ଏତେ ସବୁ ହେଲା ପରେ ମଧ୍ୟ ପାଣ୍ଡିଆନଙ୍କ ହାତ ଛାଡି ପାରୁନାହାଁନ୍ତି ନବୀନ | ଯେବେ ବି ପାଣ୍ଡିଆନଙ୍କୁ ନେଇ କୌଣସି ପ୍ରସଙ୍ଗ ସାମ୍ନାକୁ ଆସୁଛି ନବୀନ ସେସବୁକୁ ଏଡାଇ ଦେବା ସହ ପାଣ୍ଡିଆନଙ୍କୁ କ୍ଲିଟଚିଟ୍ ଦେଇଦେଉଛନ୍ତି |
