ପ୍ୟାରିସ୍ରେ ଜାରି ରହିଛି ଚଳିତ ବର୍ଷର ଅଲିମ୍ପିକ୍ସ । ଚଳିତ ଅଲିମ୍ପିକ୍ସରେ ଭାରତ ଏପର୍ଯ୍ୟନ୍ତ ସୁଟିଂ ଇଭେଣ୍ଟରେ ମୋଟ ୩ଟି ବ୍ରୋଞ୍ଜ ମେଡାଲ ହାତେଇଛି । ଏବେ କିନ୍ତୁ ସମସ୍ତଙ୍କ ନଜର ରହିଛି ଭାରତର ଗୋଲ୍ଡେନ୍ ବୟ ନୀରଜ ଚୋପ୍ରା ଙ୍କ ଉପରେ । ଦେଶବାସୀମାନେ ଏଥର ମଧ୍ୟ ନୀରଜ ଚୋପ୍ରା ଙ୍କ ଠାରୁ ସ୍ୱର୍ଣ୍ଣ ପଦକର ଆଶା ରଖିଛନ୍ତି। ନୀରଜ ଚୋପ୍ରା ଆସନ୍ତା ଅଗଷ୍ଟ ୮ରେ ପଦକ ପାଇଁ ପ୍ରତିଯୋଗୀତା କରିବେ । ବର୍ତ୍ତମାନ ଏହାରି ମଧ୍ୟରେ ଏକ ଭିସା କମ୍ପାନୀ ଏକ ସ୍ୱତନ୍ତ୍ର ଅଫର ଆରମ୍ଭ କରିଛି । ଭିସା କମ୍ପାନୀ ଆଟଲିସ୍ ର ସିଇଓ ମୋହକ ନାହତା ସୋସିଆଲ ମିଡିଆ ପ୍ଲାଟଫର୍ମ ଲିଙ୍କଡିନ୍ରେ ଏଭଳି ଏକ ଏକ ପୋଷ୍ଟ ସେୟାର କରିଛନ୍ତି ଯାହା ସାଧାରଣ ଲୋକଙ୍କୁ ଆଶ୍ଚର୍ଯ୍ୟ ଚକିତ କରିଦେଇଛି । ସେ ଲିଙ୍କ୍ଡିନ୍ରେ ପୋଷ୍ଟ କରି ଲେଖିଛନ୍ତି ଯେ, ଯଦି ନୀରଜ ଚୋପ୍ରା ଏଥର ପ୍ୟାରିସ୍ ଅଲିମ୍ପିକ୍ସରେ ଭାରତ ପାଇଁ ସ୍ୱର୍ଣ୍ଣ ପଦକ ଜିତନ୍ତି, ତେବେ ଗୋଟିଏ ଦିନ ପାଇଁ ସେ ତାଙ୍କ ୟୁଜର୍ସ ମାନଙ୍କୁ ମାଗଣା ଭିସା ପ୍ରଦାନ କରିବେ। ଏହାଛଡା ଜୁଲାଇ ୩୦ରେ ସେ ଲେଖିଥିଲେ କି, ଯଦି ନୀରଜ ଚୋପ୍ରା ଅଲିମ୍ପିକ୍ସରେ ଗୋଲ୍ଡ ମେଡାଲ ଜିତନ୍ତି ତେବେ ମୁଁ ବ୍ୟକ୍ତିଗତ ଭାବେ ସମସ୍ତଙ୍କୁ ମାଗଣା ଭିସା ପଠେଇବି । ତେବେ ଜୁଲାଇ ୩୦ରେ କରିଥିବା ଏହି ପୋଷ୍ଟର ସେ ବର୍ତ୍ତମାନ ସ୍ପଷ୍ଟୀକରଣ ରଖିଛନ୍ତି ।
